圖:右起:高永文、港大校長馬斐森及陳肇始齊齊摺財神
港大李嘉誠醫學院尋日舉辦新春團拜,醫學院院長梁卓偉(Gabriel)不忘幫學院130周年「賣廣告」。佢話,今年新增一門叫做130嘅課程,因此擴招15位醫學生,教室座位唔夠,增新櫈又要經費,佢哋便心生妙計,「賣櫈」籌款。
Gabriel解釋,所謂「賣櫈」其實係公益捐獻,舊生可以捐贈五萬蚊,買下自己喺教室入面最鍾意嘅某個位置,學院就會喺櫈椅背後刻返佢嘅名,話畀之後每個喺度讀書嘅醫學生知,邊個師兄師姐支持佢哋嘅課程。Gabriel透露,籌款業績算唔錯,至今已經「賣出」四十幾個位啦。
高永文「摺」財神
鄭晴聽到,覺得港大醫學院舊生對母校,真係出錢又出心,學院財源滾滾來呀!Gabriel仲熱情邀請出席新春團拜嘅食衛局局長高永文、副局長陳肇始一齊用手工紙製作財神,可能想藉此祝願港大醫學院籌款活動繼續財運亨通!