圖：行會成員參觀將軍澳消防及救護學院，觀看學員示範救援工作
鄭晴見到消防員，好自然就會諗起一句對白，「消防員唔係英雄，我哋入火場唔係救火、係救人」咁到底消防員係點樣訓練呢？尋日一班行會成員，包括召集人林煥光以及成員鄭耀棠、李國章、周松崗、張志剛和林健鋒，去咗參觀將軍澳的消防及救護學院。
佢哋喺消防處處長李建日陪同下，參觀學院嘅模擬訓練設施，睇下學員喺模擬鐵路站、燃料庫、船隻火警和坍塌事故搜救訓練場等區域示範救援工作。呢種模擬訓練，其實可以提升消防處人員應付大型緊急事故嘅專業知識同救援技巧。
之後佢哋隨後與新入職嘅消防及救護學員交談，亦都參觀咗救護訓練區，觀看救護員示範輔助醫療技術、參觀教學大樓和消防及救護教育中心暨博物館。
參觀過後，佢哋都大讚學院設施先進而完備，為消防處人員提供廣泛和多元化嘅訓練以及互相學習嘅機會。對於香港可以擁有一支訓練有素、專業無私嘅消防和救護隊伍，呢班行會成員都覺得好自豪，希望消防同救護隊伍可以精益求精，為市民提供高質素服務。
