圖：香港中華總商會新春團拜，左起：中總選任會董梁香盈、副會長李應生、會長蔡冠深、副會長王惠貞、副會長楊華勇同常務會董范仁鶴都有出席\大公報記者李淇攝

　　香港回歸20周年，全城熱切期盼社會今年有新景象，一直熱心公益嘅香港中華總商會，尋日宣布一系列慶祝香港回歸20周年活動，除咗大家每年都期待嘅「少年太空人體驗營」，仲計劃以「一帶一路」為主題舉行連串活動，實行配合國家與香港緊密連繫嘅關係。中總會長蔡冠深仲透露，打算配合政府《施政報告》政策，每年捐款成立「一帶一路獎學金」，資助外地學生來港修讀學士學位課程添！

　　蔡會長話，中總已經計劃每年捐出約130萬元，成立「越南一帶一路獎學金」，資助越南學生嚟香港，增加彼此年輕人嘅交流。唔單止咁㗎！蔡會長話非常欣賞呢個政策，所以私人掏腰包，增設另一個「一帶一路獎學金」，資助緬甸年輕人來港讀書！

　　蔡冠深又講到，中總未來一年至少會有十幾場大型活動，包括慶祝香港回歸15周年時曾經舉辦嘅「東亞高峰論壇」，邀請中、日、韓、東盟10國經濟部長出席，討論下香港點先可以發揮「超級聯繫人」獨特角色，佢仲講笑話：「呢個係中總送畀新特首嘅一份大禮物。」中總仲會推出新嘅「一帶一路文化節」、「創新、創科、創業大賽」等，配合「大眾創業萬眾創新」的國家發展政策，邀請香港及東亞各國青年參與，交流下各地文化。

　　有咁多精彩又刺激嘅活動，其實都要使唔少錢喎。鄭晴就八到，蔡會長都幾頭痛下，因為單係呢十幾個活動，經費就起碼二千幾萬，中總而家有千幾萬活動儲備，希望有多啲捐款。鄭晴就覺得，與其眾籌唔知嚟做乜，不如捐助呢啲咁有意義嘅活動，令香港能夠向前一步啦！