圖：醫管局舉行年度新春長跑，梁智仁（圓圖）同梁栢賢（右圖中）破格演出「絕地武士」\醫管局fb圖
尋日大年初九，沙田威爾斯親王醫院好熱鬧呀，成班卡通人物嚟玩轉威院！不過睇真啲，原來係醫管局主席梁智仁、醫管局行政總裁梁栢賢破格演出，cosplay「絕地武士」，兩人拎起把激光劍，擺曬甫士，完全脫離平時一身西裝嘅官仔骨骨形象！
話說醫管局尋日喺facebook post咗新相，原來尋日係醫管局一年一度嘅新春長跑，今年喺威爾斯親王醫院舉行，超過5000名職員同家屬參與，破曬紀錄，為醫管局慈善基金籌到過百萬。
相簿入面一大班卡通人物，有比卡超、《千與千尋》角色無面人，唔講仲以為去咗動漫節添呀！
咁熱鬧嘅場面，就吸引到《星球大戰》一眾角色嚟到為健兒打氣，梁智仁、梁栢賢化身「絕地武士」之外，仲有醫管局九龍中醫院聯網物理治療部部門經理劉慕儀cosplay「莉亞公主」，由一大班「白兵」、「黑武士」、星戰七登場的新角色「BB-8」機械人簇擁擺甫士，認真有氣勢！不過，有眼利嘅星戰迷發現，黑武士拎嘅並唔係紅激光劍，而係拎錯咗紫激光劍，咦，點解嘅？
