圖：「寶馬」組織140人長跑隊參加馬拉松，尋日舉行誓師大會\大公報記者徐曉彤攝
渣馬喺呢個周日（12日）就開跑，有一位素食選手話出嚟跑係要證明「唔一定食肉先有力」，為素食者爭返啖氣；有位前港隊泳將選手就唔做飛魚，挑戰自己喺陸地嘅速度。
寶馬汽車公司組咗隊有近140人嘅「BMW iRunners長跑隊」。隊員小帕七年前患上子宮內膜癌，為咗健康，佢放棄原本鍾意食嘅餐蛋麵、叉雞飯，告別「大魚大肉」，變身素食者，而家任職健身教練。佢仲話自從食素之後，皮膚好咗，腸胃好咗，連個人都正面咗添！所以今次報名跑渣馬10公里賽，希望可以推廣素食，同埋要話畀人知「跑步又好、健身又好，其實我哋（素食者）都係普通人，同大家一樣。」目標係一個鐘內完成十公里。
飛魚登陸 志在參與
另一名隊員、前香港游泳代表隊鍾國樑曾經出戰亞運會同全運會，又做過奧運火炬手。今次回歸陸地，一向喺香港泳壇贏開巷嘅佢話今次唔預自己贏㗎喇，只係希望喺50分鐘內跑完十公里，仲話「跑步係辛苦好多囉！會流多好多汗。」話就話唔爭冠，但係佢都操咗八個月，仲成功減埋肥，半年內由120公斤，減到而家嘅92公斤。睇嚟視減肥為終身職業嘅「港女」姐妹們，都要去跑嚇渣馬。
