新一年個個都想發個新年財，連反對派政黨都唔例外。社民連主席吳文遠早前就到旺角擺檔賣熟食，同其他小販爭食，仲講到明話要為社民連立法會議員梁國雄（長毛）籌錢打官司添。唔知係咪因為社民連嘅年宵攤位銷情唔夠好，搞到身為長毛黨友嘅吳文遠要做埋小販嚟幫補下訟費呢？
長毛同另外幾位喺宣誓時「玩嘢」嘅反對派立法會議員，早前被政府入稟高院申請司法覆核，挑戰其宣誓有效性。吳文遠就喺大年初一至初三期間，每晚都推架小販車去旺角擺檔賣關東煮，仲試過喺Facebook出post，聲稱自己係「撐小販」，呼籲網友支持咁話。不過，唔少網民就唔多支持吳文遠喇，話佢以「撐小販」為名、「掠水」為實，唔會畀錢「政棍」喎。
