送猴迎雞！多位民建聯立法會議員新正頭紛紛落區向市民拜年。唔知係咪近年香港畀反對派「玩轉再玩轉」，太多撕裂衝突發生，佢哋都希望香港新一年社會能夠政通人和、和氣生財。

　　民記主席李慧琼（Starry）前日聯同蔣麗芸（Ann）落咗土瓜灣、紅磡等區，以一襲紅粉緋緋look向市民拜年，之後又去楓樹街球場支持墟市，祝願今年香港政通人和、和氣吉祥。Ann姐就嚴選咗精美的金幣朱古力派街坊，佢話，係助理親自挑選及試食多款後先入貨，好多街坊都話正啊！

　　唔好再「初四咁嘅樣」

　　張國鈞、陳克勤同柯創盛呢三個民記小生就一齊拍咗段片賀新禧。張國鈞話，希望香港新一年多啲正能量，好似香港鐵路系統咁路路暢通。克勤就講到「相嗌唔好口」，希望來年港人能一團和氣，笑口常開！就連黨友葛珮帆都話，新一年香港要天下太平，人人笑口常開，雞年日日金雞報喜，最重要係立法會不再有「拉布」！

　　至於今年係本命年「雞仔」劉國勳，亦趁新正頭製作好多得意嘅GIF圖同網民拜年，祝大家「雞糊變爆棚」，雞年行大運！副主席周浩鼎亦拍片上載至Facebook，祝市民身體健康，闔家安康、財源廣進、如意吉祥，仲叫「泛民」唔好再「拉布」，讓工程順利上馬，咁先可以開工大吉！鄭晴都祝願大家今年唔好再「初四咁嘅樣」，因為和氣先會生財嘛！