圖：吳克儉形容自己上任四年半以來，各方面都有交功課，絕無「走數」\資料圖片
政府換屆在即，教育局局長吳克儉尋日同一班記者茶敘時就話，自己現時「心無二想」，只希望在6月30日前盡最大努力去完成所有承諾。佢形容自己上任四年半以來，各方面都有交功課，絕無「走數」，好似落實幼稚園免費教育，擴大大學資助學額等。
吳克儉又講到坊間唔少人對教育政策欠缺認知，所以開Facebook加強溝通，對於外界惡言批評及形容佢係「外遊局長」，佢話視部分批評為「人格謀殺」會自行「ignore」（略過）。佢又提及去年三月同六月，媽媽和太太分別離世，對佢打擊非常大，憶述太太叮囑時更忍唔住眼紅紅話，會謹記太太教誨，「教育好重要，你做什麼也好，也要全力以赴」，強調要勿忘初心。佢更主動重提2015年缺席立法會TSA公聽會，係因為一早約好屋企人去到日本旅遊，當時已經即時向立法會提出另一個建議日期，但未獲接納，強調自己做足工作。至於休假時私人外遊，他認為並無問題，強調自己「無放曬啲假」。
