香港民族黨日前被食環署取消咗維園年宵嘅特許經營權，佢哋就轉戰喺網上出貨。咁多蟹貨，單靠網上就唔係好掂嘅，於是畀佢哋諗到一條「絕世屎橋」，就係「特許銷售計劃」。只要購買一定數量產品嘅參與者，就可以用自己身份去賣貨，所賺得款項唔使同香港民族黨攤分，但民族黨就講到明話畀錢之後無得退款或退貨，又話有關風險要自己承擔喎。呢個計劃仲要唔准其他政黨組織參與添！
其實，有邊個咁蠢會上當呢？單單係香港民族黨呢個名就臭曬啦，設計唔得、又賣得貴、仲要宣揚「港獨」，邊個肯參與啊！而家連佢哋嘅支持者都鬧爆「民族黨」。網民Angel Chan就話：「你哋推呢個計劃出嚟間接係推啲參與者去送死囉！佢哋幫你哋手買咗啲貨，之後要周圍擺檔賣番出去……即係叫佢哋做小販駁畀人拉啦！你哋又講到明由參與者自己承擔風險……即係貨就畀咗你啦，錢我就收咗，你死你事……我覺得你哋好不負責任。」
所以話，由頭到尾，香港民族黨不過係為咗私利，不斷犧牲年輕人大好前途。
