身為政府推廣惜食運動吉祥物嘅「大嘥鬼」，最近又有新搞作喇。環境局最近出咗一條新廣告，搵嚟歌藝了得嘅蔣志光同大嘥鬼一齊唱歌拍廣告，呼籲市民關注氣候變化問題。大嘥鬼見到唔少市民對個廣告反應正面，仲喺自己嘅Facebook專頁上載咗廣告歌嘅三分鐘足本版MV添。
廣告歌係將林子祥嘅《海市蜃樓》改編而成。大嘥鬼發帖話，佢將自己嘅心聲，同埋對大家嘅叮囑寫曬落首歌度，希望大家能夠一齊行動，拯救地球。歌詞除咗指出現時氣候反常，仲提咗好多減少碳排放嘅建議，包括使用有一級能源效益標籤嘅電器、揸少啲車、開少啲冷氣、減少浪費食物等等。
唔少網民都響大嘥鬼嘅Facebook專頁留言讚好。有網民留言話大嘥鬼好勁，「連蔣志光都請到」。大嘥鬼就留言話：「其實佢係我fan屎（fans）」，亦都有網民話啲歌詞好易記。希望呢個廣告可以鼓勵到市民投入低碳生活啦。
