圖：經民聯年宵檔名叫「香港一定duck」，希望香港樣樣都duck（得），仲請到高醫生（左二）撐場 大公報記者黃洋港攝
維園年宵尋日開鑼，多個政黨都有擺檔，食物及衛生局局長高永文尋日就去咗經民聯攤位撐場。經民聯主席盧偉國話，今年年宵主題就係一隻膠鴨，檔名都叫「香港一定duck」，而呢隻鴨仔喺香港好出名，有70年歷史，代表香港工業騰飛，經濟奇跡，今次希望事事亨通，樣樣都duck（得）！高局長就話，其實佢細細個都有玩呢隻鴨仔，同時覺得呢隻鴨仔好有意義，希望香港人發揮獅子山下嘅精神，重要就係同舟共濟，同心一德，希望大家保重身體。民政事務局副局長許曉暉就祝願大家事事如意。最後高局長仲幫襯經民聯買咗三套鴨仔禮物包，當中包括鴨仔筆袋、黃色玩具鴨、鴨仔造型嘅長尾夾等等，盛惠504元。
新民黨亦都有開檔，今年仲係第七年擺檔，新民黨主席葉劉淑儀話，祝願大家大吉大利，心想事成，共建和諧社會。雞年嘅普通話同「機會」嘅「機」字同音，即係今年係機會之年，處處有機遇。去年香港經濟發展緩慢，希望今年能夠努力向上。常務副主席田北辰祝願各位雞年行大運，容海恩就希望大家能夠身體健康。
