阿Paul同大家分享佢拎住嘅「無價之寶」
大公網1月22日訊 21日原來係謝偉俊（阿Paul）嘅58歲生日，佢話除咗日頭同同事一齊切蛋糕、夜晚仲同白姐姐、其他朋友一齊慶祝，今年仲有一樣同大家分享。
阿Paul喺網上上載咗一張佢拎住「無價之寶」影嘅相，佢話，相中自己拎住嘅，係一張1959年1月21日嘅日曆，係佢媽媽喺佢出世之後，特登撕落嚟保留嘅。
阿Paul仲好感性咁話，呢一張薄薄嘅紙雖然隨住時間過去而泛黃，但對佢嚟講，係珍貴嘅記憶同證明。阿Paul都無忘記到為佢保留呢張日曆嘅媽媽，將呢張相send畀遠在美國嘅阿媽睇，話因為佢嘅生日就係阿媽忍受疼痛嘅同一日。鄭晴覺得，阿Paul自己生日都不忘媽媽生兒育女嘅偉大同對佢嘅愛，真係好難得。其實心繫媽媽，每一日都可以係母親節。
