根據正式紀錄，舊年嘅立法會選舉有超過220萬選民投票，不少票站仲大排長龍，令到市民深夜都未投完票，點票時間更加係大幅延長，真係點到天光㗎！上個月選管會就提交咗「2016立法會換屆選舉報告書」畀特首梁振英，裏面就投訴呢個票站場地安排。選管會話，因為點票點太耐啦，搞到好多學校都怕咗政府唔肯借場，驚影響莘莘學子晨早返學喎！政制及內地事務局有見及此，就提出幾個建議，而其中一個，就係考慮將立法會選舉投票日翌日（即係星期一）定為「學校假期」，等學生同點票唔使撞時間，即係咩？即係每隔四年，全港中小學生隨時多日假期！
其實除咗投票第二日放假呢個建議之外，政制及內地事務局都提出其他方法嘅，例如將投票日訂喺星期六，星期日學校放假就可以有更多時間點票。又或者可以為每個地方選區，各設立一個或多個分區點票站，分散人手點票提高效率。呢啲建議下星期三將會喺立法會政制事務委員會上討論，除此之外亦會探討選票設計、選票運送安排同准唔准候選人在提名期內「棄選」等。
鄭晴
