雖然大嘥鬼眼闊肚窄，不過香港市民就幾鍾意呢隻鬼，因為大家都會記住千祈唔好浪費食物嘛。尋日大嘥鬼就係Facebook發帖，話要請小鳳姐喎。嘩，有咩要「熱烈地彈琴熱烈地唱」呢？原來「咪嘥嘢食店」而家增加到七百幾間餐廳，為咗表揚每月之星，佢仲會親自落場添，幫啲員工打下氣，同埋要見一見啲粉絲囉！佢仲好幽默咁話，今日要跑三場就係做偶像嘅代價喎！到底佢會邊幾日會見粉絲呢？就係今日、今個星期日同埋下星期五。如果係大嘥鬼嘅粉絲，記得上佢嘅Facebook留意下啦！
「咪嘥嘢食店」呢個計劃其實就係鼓勵食肆減少廚餘，計劃會分為銀級及金級嘅表揚，其實都係鼓勵顧客食曬所叫嘅食物，或者將有剩嘅飯菜帶走，參與餐廳亦要提供少飯、主菜分量提供大小選項咁樣。大家記得唔好浪費食物啦！
