大公產品

首頁 > 产品 > 港东港西 > 正文

Starry讚張司長: 服務市民有團火\鄭晴

時間:2017-01-18 03:15:21來源:大公網

  圖:張司長有服務市民嘅一團火,所以爭取時間多作溝通,為日後合作建立基礎

  按照慣例,政務司司長會定期同立法會內務委員會嘅正、副主席見面,就政府建議項目嘅議程安排,同埋議員關注嘅事項交換意見,張建宗啱啱新官上任,亦唔破例,尋日就同內會主席李慧琼(Starry)及副主席郭榮鏗會面。Starry事後仲喺Facebook上載咗三人嘅合照添。

  Starry喺帖文話,自己身為立法會內會主席,同政務司司長定期開會係恆常工作。佢話,尋日嘅會議時間比平時較長,因為大家都知道,喺施政報告公布後,張司長將會非常忙碌,所以佢同郭榮鏗都爭取時間多作溝通,為日後合作建立基礎。佢又認為,有好嘅溝通係一個好開始,希望日後行政立法關係能夠更加暢順。

  Facebook直播同網民交流

  Starry仲喺帖文打咗三個hashtag(主題標籤):「#新官上任三把火?」、「#張司長當然唔會發火」,同埋「#只有服務市民嘅一團火」,大讚張建宗。

  另外,最近愈嚟愈多立法會議員利用Facebook直播同網民交流,Starry亦都搞咗個名為「慧星直播」嘅節目。尋日係第一集,Starry就簡介咗內務委員會嘅職能同埋會議廳前廳嘅功能。估嚇下次會講啲咩話題嗱?

最新要聞

最新要聞

最受歡迎