大公網1月17日訊 今日一班民政事務委員會嘅議員去香港體育學院參觀，馬逢國、劉國勳(阿勳)、容海恩等議員都有去。不時喺facebook分享香港運動員獲獎嘅阿勳，今日就係facebook發帖，話參觀之後大開眼界，因為體育學院嘅環境模擬室，可以控制溫度、濕度、氣壓，模擬出精確嘅訓練環境，俾運動員使用，咁樣就可以發揮到最大嘅鍛鍊效果。現場介紹仲話，運動同科學數據係息息相關，就好似桌球咁，係有曬數據分析。
阿勳仲好搞笑咁話，希望可以睇到《龍珠》入面嘅十倍重力室，仲話運動員食飯都要睇住營養標籤去計。不過搞笑還搞笑，阿勳都好認真話要希望政府增加支援香港運動員。香港運動員付出咁多汗水，更有唔少運動員喺國際賽獲得獎項，希望政府能夠支援香港運動員，令到佢哋可以為港爭光。
