大公網1月14日訊 民建聯陳克勤今晚喺社交網站上面上載咗幾張相，同大家隆重介紹洪爺、劉文強同容亞珍出場！係咪覺得個名唔多對路呢？其實三位分別係由陳克勤、劉國勳（Edward）同容海思（Eunice）裝扮而成嘅懷舊電視劇角色。至於原型係邊位，相信都唔需要我多介紹喇。
陳克勤喺相入面著住唐裝，一手拎住拎住一樽懷舊糖果，一手揸住一頂黑色紳士帽，相當有型。那邊廂，Edward都唔差，一件黑色乾濕褸襯埋白色頸巾，一睇就知係上海灘嘅造型啦。兩位議員之後好搞笑咁喺相度留言，Edward話自己係臨時演員，而克勤更加留言，叫大家叫佢洪爺喎。
面對兩位型男，平時以靚女見稱嘅Eunice就一改形象，變身成傻大姐容亞珍，圓框眼鏡加埋爆炸頭假髮，搞笑得嚟夠曬新鮮感。
其實三位議員係出席緊青年網絡嘅懷舊派對之夜，Edward仲搵到一部好懷舊嘅香港遊戲機，佢自己試玩完都有影相同大家分享，話佢細過喺街市文具鋪同士多零食鋪都有玩過。
