圖：林鄭尋日開記者會有「飛龍」布景唔係「大細超」/大公報記者何嘉駿攝

　　要數尋日最哄動嘅香港大事，非政務司司長林鄭月娥喺政府總部宣布辭職莫屬。網民除咗關注林鄭幾時會宣布參選特首，連尋日佢身後印有「飛龍」香港品牌標誌嘅易拉架布景都惹人遐想。事關財政司司長曾俊華上個月喺同一地點宣布辭職嗰陣，「飛龍」布景唔見咗，令人猜測特區政府係咪「大細超」喎。

影相會好花 財爺要求收起

　　鄭晴尋日都有份喺現場採訪，當然有向政府新聞處問個究竟啦。有職員解釋，上次曾俊華見記者之前，財政司司長辦公室就同政府新聞處講，話有「飛龍」布景嘅話，影相望落會好花，希望能夠收起。至於今次，由於政務司司長辦公室無提出同樣要求，所以就無收起。嗰位職員仲笑言，唔好咁「陰謀論」喎。哈，只可以話，網民嘅創作力量同幻想，有時真係會嚇你一跳。

　　另外，鄭晴又發現，有網民疑似假冒林鄭月娥，整咗個Facebook專頁。專頁名為「林鄭月娥 Carrie Lam 2017」，裏面第一個帖文，係喺尋日晏晝五、六點左右發出嘅，係用咗林鄭嘅一個相做專頁嘅頭像；之後又發多幾個帖，包括分享一啲有關林鄭嘅報道、林鄭尋日宣布辭職講話全文，同埋聲稱林鄭以「遏止港獨」、興建香港故宮文化博物館作為「政綱」等。

　　驟眼睇，個專頁又真係似模似樣嘅，有時仲會回應網民留言，模仿林鄭同市民交流咁。不過，眼利嘅鄭晴就發現，專頁嘅簡介居然寫話「支持林鄭月娥擔任2017年香港特首」。如果個專頁真係林鄭開嘅，佢點會寫話自己支持自己做特首？呢位假冒林鄭嘅網民，今次真係百密一疏喇。