圖：詩鈞2007年以九歲之齡入讀大學，創下最年輕大學生紀錄/資料圖片
香港出產咗唔少神童跳級讀大學，但提起「神童」，相信大家一定記得數學神童沈詩鈞。2007年佢以九歲之齡入讀浸會大學，創下本港最年輕大學生嘅紀錄，當年入學時一臉稚氣，眨下眼，詩鈞原來已經18歲仔，鄭晴聽聞佢已經喺美國讀完博士，仲喺加州大學洛杉磯分校（UCLA）數學系擔任客席助理教授，「神童」之名果然唔係浪得虛名！
爸爸係印尼華僑嘅詩鈞，英文名叫March Boedihardjo，阿哥沈怡謀14歲就入咗英國牛津，可謂「一門雙傑」。講返詩鈞威水史，英國高考拎到2A1B，2011年13歲時仲提早一年完成咗浸大五年嘅學士兼碩士課程，之後去咗美國德州農工大學做「訪問學人」。鄭晴響UCLA數學系網頁都搵到佢個名，研究範圍係泛函分析。
除咗詩鈞之外，本港都出產過「物理鳳凰」何凱琳、「簡SIR」簡文鋒等「神童」，當時僅14歲嘅凱琳響中學會考中獲9A1B，獲中大取錄，08年亦有13歲嘅簡文鋒響會考考到2A5B獲中大取錄。
