圖：陳恒鑌（左）劉國勳（右）一齊讚的士有得幫電話叉電夠曬方便/大公報記者陳卓康攝

　　近年出租車行業競爭激烈，面對Uber同政府建議「優質的士」專營權嘅挑戰，傳統的士都要諗辦法積極求變。擁有74架多用途的士的星群的士（SynCab），今日起推出30輛新款「星群特選的士SPT」，車款雖然係市面最常見嘅豐田四座，但就換上人造皮革豪華椅，車廂有WiFi上網、USB充電，GPS定位分享、信用卡付費，仲設有程式睇實司機有無兜路、突然剎車等。

　　不時遇到拒載的士

　　民建聯立法會議員陳恒鑌（Ben）同劉國勳（Edward）專程一齊試坐新車，大讚舒服，有得叉電、上網同電子付款好吸引。Edward話經常要穿梭北區與港島，經常趕時間要「飛的」，不時遇到拒載唔想過海嘅「冚旗」的士，樂見更多好司機。本身係立法會交通事務委員會主席嘅Ben就話，難得有的士商肯蝕住投資改善服務，值得公眾多啲鼓勵。

　　星群的士老闆鄭敏怡（Sonia）話，1月16日至27日中午時間會喺中環商業區試運，街上截車起表及跳表收費同普通的士一樣，經手機app預約就要額外收40元服務費，全額撥歸司機，如果反應好會再擴充車隊，服務其他地區。航運交通界議員易志明就話會爭取開放多啲專線畀的士上落，希望政府唔好倉卒推優質的士發牌。