圖：Alice轉咗個新髮型，感覺幾清新喎！
農曆新年就嚟到，鄭晴尋日就同工聯會立法會議會麥美娟（Alice）傾開，佢話過新年最鍾意係食蘿蔔糕同年糕。Alice仲話，佢最鍾意將啲年糕切得薄一薄，再沾上厚厚嘅蛋漿香煎就最正喇。佢話新年嗰幾日，如果喺屋企唔使出去拜年，都會叫屋企嘅工人幫手煎糕，年糕同蘿蔔糕各煎一半，仲會擺滿用嚟蒸魚嘅碟。咁大份嘅煎糕，Alice竟然可以一個人全部食曬！最重要嘅係，就算Alice新年咁樣食完，佢都只係會輕輕增磅。其實，以議員平時嘅工作咁忙碌，應該好快就消耗曬呢啲糕點，又點會有得增重。
另外，呢排Alice轉咗個新髮型，係一個日式嘅齊蔭蘑菇bob頭，感覺幾清新。Alice話因為成日畀人話佢個樣惡，所以同髮型師傾嘅時候叫佢諗諗新意思。其實Alice平時一啲都唔惡，做委員會主席時發言仲幾搞笑添。
