公民黨「過氣」議員陳家洛仲做緊立法會議員時，已經成日大言不慚，曾經公然叫班學生諗下有無想過有朝醒來，五星紅旗升不起，仲話如果係咁「這政權真的倒了」。家陣陳家洛連議員都無得做，消失咗一排，尋日佢「突襲」特首辦，學人向政府請願喎。特首梁振英（CY）見到呢位不速之客，就連續四次面斥佢，仲手指住國旗同對方講：「這裏是每天早上八點升五星紅旗的地方，是中華人民共和國香港特別行政區，是在中華人民共和國裏實行民主選舉。」

　　陳家洛被串，當然深深不忿啦，於是乎就同親反對派嘅傳媒亂噏，話CY一見佢就出言挑釁，更一手取去請願信，未有聽取意見。

　　CY其後就喺網誌撰文解畫，仲引述2015年1月陳家洛接受報章採訪時講過：「我時時在班上挑戰我的學生，問有無想過有天早上醒來，五星旗升不起……」去年九月陳更撰文話：「試想像某天一覺醒來，那象徵着中國共產政權的五星紅旗升不起來了，這個政權真的倒了。」

　　國旗飄揚片放上網 方便睇

　　鄭晴仲記得好清楚，CY曾經針對有關言論，公開批評過陳家洛，話要有輿論壓力防止相關言論蔓延，叫市民多發聲，唔好等青年被有關言論「毒害」。不過近年「獨勢」蔓延，鼓吹「前途自決」的公民黨亦難辭其咎，難怪CY一見陳家洛就有火啦！

　　CY話，早上開行會前，按慣例接見市民，點知見到「久違的前議員」陳家洛，所以就話：「特首辦大樓每朝八時都會升起五星紅旗和區旗」，歡迎陳前議員得閒來看升旗。佢下午仲專門喺Facebook上載咗特首辦大樓外五星紅旗和區旗迎風飄揚嘅短片。鄭晴心諗，陳家洛就算唔得閒再去特首辦睇升旗，上網都可以睇到㗎。

　　鄭晴