經民聯尋日喺土瓜灣遊樂場筵開超過二百席，邀請三千位來自全港各區的街坊好友一齊食盆菜，除咗聯盟七位立法會議員，連政制及內地事務局局長譚志源、食物及衛生局局長高永文、中聯辦九龍工作部部長何靖、中聯辦新界工作部副部長張肖鷹等人都有到場，真係星光熠熠呀。
經民聯主席盧偉國致辭時就話，雖然聯盟議員背景都以工商專業為主，但其實工商專業同樣可將地區工作做得「貼地」出色。佢話，作為年輕黨團，經民聯會堅守「工商帶動經濟，專業改善民生」宗旨，為業界發聲之餘亦做好地區工作；佢同時又向大家拜早年，寄望香港回復和諧，呼籲大家努力創造香港的未來。
咪以為淨係食盆菜呀，盧偉國仲即場用色士風演奏歌曲《獅子山下》，連高永文都JAM埋一份上台獻唱，令到台下觀眾掌聲陣陣，大家聽出耳油呀！高醫生仲話，政黨工作不容易，他支持經民聯做好地區工作，繼續為香港的繁榮穩定而努力，希望港人係獅子山下互勵互勉添。
