圖：「全城躍動活力跑」在沙田城門河畔舉行，參加者享受運動樂趣同時欣賞風景

　　「日日運動身體好！」昨日幾乎每區都有大大小小嘅跑步同步行活動，包括有公益金百萬行、「全城躍動活力跑」同中原慈善跑等等，有參加者就一家大細以跑步享受家庭樂；有視障人士就參加比賽一展所長；亦都有參加者悉心打扮出席，鄭晴見到都想即刻放低條稿去跑個圈呀！

　　區區都墟冚

　　尋日港、九、新界都有唔同嘅跑步活動。最墟冚係東九龍「全城街馬」，有逾1.1萬人參賽，創歷屆新高。

　　去到港島區一樣咁熱鬧，仲有大班藝員，包括麥明詩、麥美恩同胡定欣等同你一齊行！講緊就係公益金舉辦嘅，港島、九龍區百萬行，逾萬人由香港大球場出發，經黃泥涌峽道、布力徑、香港仔水塘道至香港仔郊野公園遊客中心，路線全程長約10公里，行完全程大約要三至四小時，冇咁上下毅力都唔得㗎！

　　新界都有好多活動，第六屆全港運動會「全城躍動活力跑」及嘉年華活動，尋日就喺沙田城門河畔圓滿舉行，超過5500位市民踴躍參與，現場氣氛熾熱。而生命小戰士會亦喺沙田舉行第三屆步行籌款，希望透過活動，令更多人關注患病兒童以及其家屬需要，等大家送上關懷。科學園就有慈善跑嘉年華，結合運動、慈善、傷健共融和親子的元素，參賽者包括視障跑手及健視朋友，更設有奇服歡樂跑項目及一公里家庭跑，市民大讚活動，「實在相當有心思」！

　　而尋日咁多活動，行政長官梁振英和特區政府多個官員都有參與，特首夫婦就為公益金百萬行主禮，政務司司長林鄭月娥就擔任「全城街馬」嘅嘉賓，勞工及福利局局長張建宗、食物及衛生局局長高永文及民政事務局局長劉江華就齊齊現身新界的三個活動，個個都係為慈善、為運動親歷親為呢！

　　鄭晴