圖：熱血公民早排成日上街搞搞震，搞到香港亂曬 資料圖片
行所謂「勇武」路線嘅「港獨」組織熱血公民，居然諗住「從良」，撤出社運？被奉為「熱狗新首領」嘅鄭松泰接受網媒專訪嘅時候聲稱，依家搞街頭行動嘅風險比以前大，又話組織內部可能有「無間道」，所以短期內將會全面撤出社會運動、推動政黨化，積極轉搞社區服務喎。佢仲話，由前「首領」黃洋達營運嘅《熱血時報》，將會同「熱血公民」分開運作喎。
另外，「熱普城」陣營自立法會選舉落敗後四分五裂，陳雲嘅「城邦派」近日亦爆發叛逃潮，昔日獲「冊封」為「太子」、「公主」嘅支持者紛紛掉轉槍頭力數陳雲不是，「忠烈公」「天河明人」留言「一個年過五十半百，過氣的前民政事務局人員＆前教授＆作家……現在要淪落到在Facebook和一眾年輕作家爭飯食，更輸到眾叛親離……我不覺得陳雲可恨，只是可悲吧」。陳雲即回應稱：「撤銷天河明人一切封號，並驅逐出城邦派，永遠不許回來，此生不再相認」。鄭晴喺度食下花生，都覺得真係一場鬧劇呢！
