由人稱「長洲覆核王」郭卓堅擔任顧問嘅「JR團隊」搞搞震，尋日由召集人港大法律系學生盧俊宇就西九文化區興建故宮博物館一事提出司法覆核（Judicial Review，JR），聲稱興建西九故宮博物館沒有作出公開諮詢同招標。不過政府尋日亦都出咗通告，指就建故宮博物館一事進行六星期嘅公眾諮詢。之但係盧俊宇話之你，仍然堅持入稟，話因為未清楚諮詢內容，「唔知係真諮詢定假諮詢」喎！

唉！又有人搞JR。連民建聯立法會議員蔣麗芸（Ann姐）都話「搞什麼呀！」Ann姐話，政府同北京簽定嘅只係故宮博物館合作「備忘錄」，或俗稱意向書，根本無法律約束性，更非什麼正式協議，有人未搞清情況就提出司法覆核，係咪過分衝動呢？Ann姐又話，簽完備忘錄之後，在簽正式合作協議之前才作諮詢係適合嘅，亦符合西九管理條例規定，再加上政府從無話過唔諮詢公眾，咁又何罪之有呢！「政府簽一張備忘錄都被司法覆核，政府以後仲點做事？」

郭卓堅匿幕後「指點江山」

郭卓堅咁多年嚟一直用法援，進行大大小小嘅司法覆核，早前被本報踢爆涉隱瞞資產申請法援，佢尋日都話因為本報報道，自己唔敢再提JR喎，唔怪得之「覆核王」而家要退居幕後，搵「新人」繼續司法覆核啦！盧俊宇都學足「覆核王」，聲稱「自己係普通市民」，若獲批司法覆核，會申請法援打官司。嚇，咁咪係又用公帑打官司？鄭晴無眼睇喇！