居港印度人搵民記幫手
圖：Starry（左起）、Holden、Vincent一齊去印度駐港總領事館開會 網上截圖
印度政府去年11月突然宣布奇招打貪，將佢哋最大面額嘅500盧比同1000盧比鈔票作廢，喺50日內回收兩種鈔票，過咗期限都未回收嘅變廢紙。
民建聯主席李慧琼（Starry）尋日就話，有印度朋友問佢哋，唔知點先可以將佢哋手上嘅鈔票換番。Starry就安排同印度駐港總領事館開會討論，民建聯副主席周浩鼎（Holden）同民建聯少數族裔委員會主席鄭泳舜（Vincent）都一齊開會。
Holden話，對於居港印度朋友嘅擔憂，領館方面講，類似嘅情況喺好多地方都有發生，例如新加坡同其他南亞國家。印度政府考慮緊點解決呢類問題，目前要等報告推出先知點解決，本身仍然有兩種鈔票嘅印度國民需要暫時等等啦。
Vincent就話，自己作為少數族裔委員會嘅主席，經常收到呢個問題嘅查詢。佢話開會時領事館方面反應正面，對方好了解問題，目前印度朋友都係keep住呢啲鈔票先，唔好丟住，民建聯會幫大家繼續跟進！
