新年快樂！踏入2017年，第一個網民熱話相信就係喺元旦出世嘅「神之子」喇。呢位咁「神」嘅男嬰，因為爸爸係好罕見嘅姓氏「神」，加上佢喺零時零分出世，隨即被網民封為「神之子」，仲有唔少網民爭相同佢改名，好似叫神仙B、神經、神隊友、神童等。
神爸爸尋日就喺Facebook代入兒子「神之子」身份，以「本尊」自稱撰文，話投胎到神家實在有妙不可言嘅緣分，「試諗下香港每年有幾多BB出世，但係元旦B得嗰兩三個，姓神嘅家族又少之又少，當中嘅或然率計完都唔知會唔會仲難中過六合彩」。「本尊」仲話，神爸媽已經收到不少「百姓」對佢起咩名嘅建議，神爸媽會盡快起個合適同有威望嘅名，但由於私隱問題，除咗美女私訊外，恕不向外界公開交代啦，亦都希望網民不要「爆響口」和「人肉起底」，保持有節制同健康嘅討論。
另外，神爸爸澄清無收到任何免費贊助，無免費奶粉、無免費尿片等，呼籲大家唔好再FF啦。最後，鄭晴亦恭喜曬「神父（親）」，希望神氏一家幸福快樂！
