民建聯創黨主席曾鈺成揮筆寫下年度漢字，他認為「亂」字當選反映人心思定，希望亂象盡快過去。大公報記者周禮希攝

　　文｜鄭晴

　　2016年就嚟完結喇，唔知大家會用邊個字表達過去一年嘅觀感呢？民建聯嘅2016「香港年度漢字」投票尋日就公布結果，近三成有份投票嘅市民由十個漢字當中，選出「亂」字做年度漢字，緊隨第二位就係「穩」字。今次投票嘅有效票數有13277張，投票率創歷年新高，而當選嘅「亂」字就得票3776張，係總有效票數入面嘅兩成八，可想而知市民係幾咁厭倦「亂」象，渴求「穩」定。

　　票投「亂」字顯人心思定

　　對於投票結果，民建聯創黨主席曾鈺成表示，過去一年香港嘅亂象比往年多，除咗年初一事件，新一屆立法會起初亦有相當困難嘅時候，市民都感受到議會、社會的秩序受衝擊。又話由較哲學嘅角度睇，選出「亂」字，亦可以反映香港市民人心思定、人心思穩，希望亂象盡快過去。

　　民建聯副主席陳勇亦都認同呢個講法，佢話今年市民選出亂字，相信係對於年初一旺角暴亂印象深刻。勇哥就希望出年香港有更光明嘅前景，而副秘書長葉傲冬都話，今次選舉結果，反映市民盼望香港回歸穩定。

　　今次民建聯2016「香港年度漢字」，先由評審委員會選出年度十大漢字，再喺網上由市民公開投票，投票期歷一個月，十大漢字就分別係：亂、穩、安、禮、智、理、同、機、創及思，你有冇同感先？