陳恒鑌分享露營煮飯仔。Facebook圖片
聖誕長假,唔少人選擇去旅遊,陳恒鑌(阿Ben)都唔例外,不過佢就唔係去北海道過大雪紛飛嘅「白色聖誕」,而係同屋企人一齊去大嶼山露營。
佢喺社交網站分享郊遊嘅少少感受同靚景靚相,話去露營、觀日、煮飯,接近大自然,係減壓嘅最佳選擇,文中仲特別提到一齊去露營嘅囡囡。
阿Ben話,行過長長嘅斜路,必然感受到背囊嘅沉重,但係佢嘅囡囡喺過程中竟然毫無怨言,仲打頭陣行。佢又提到,囡囡連十級臭嘅旱廁都頂得順,發現露營對治療現代人公主病嘅功效顯著咁話喎。阿Ben又話,進一步走入大嶼山,感受到更多寧靜和美麗。佢喺網上都貼咗好幾張沙灘、營地同日落嘅相與大家分享。睇嚟阿Ben同囡囡經過今次旅程,都獲益良多。
阿Ben去到郊遊都不忘工作,佢話籮箕灣需要改善排污,以免洗潔精污染河道,開工後就會即刻反映返添呀。