大公網12月19日訊 上年輸咗區議會選舉,今年又輸埋立法會選舉,「雙失」馮檢基似乎仲未心息喎!今日佢出席電台節目時,講到梁頌恆、游蕙禎議席出缺,而自己正積極考慮參與補選,並且向黨友表達意願啦。民協今個月底就會改選領導層,但中委就未有討論補選問題,但阿基就話,作為一個政黨,尤其係九龍西服務三十幾年嘅政黨,睇唔到點解民協唔參加補選。不過呢,民協下午三點左右就係facebook發帖,話仲未正式決定係咪派人參選,人選都未定,歡迎大家畀意見喎!
有時真係忍唔住笑,阿基都一把年紀啦,輸咗兩次仲唔未死心,仲要透過電台放風,希望利用民意向民協領導層逼宮,搞到民協下午專登出帖澄清,民協送咁大個檸檬俾阿基,真係好瘀囉!仲有,睇下網民留言,大部分都係唔希望阿基再選,網民Konstantine Avraham Matatyahu表示:「Anyone but FKK(任何一人,除了馮檢基)」另一網民Milka Wong就話:「基哥真係唔可以再出,何啟明難得打響到少少知名度,可以一試。」阿基,好好退休啦!