講起朱寶生，大家未必知佢係邊個，但係一講喺七月書展開幕，有位「電車男」一馬當先跑去買「雞排妹」寫真，但點知原來未出，大家係咪有印象呢？鄭晴當日睇到呢單新聞真係笑到肚痛。呢個朱寶生原來係「熱狗」成員，因為今年聲援旺角暴亂被捕者同愛國人士發生衝突，結果被控普通襲擊罪。佢尋日接受《蘋果日報》專訪，話經過今次案件之後，而家淆底同心灰意冷，仲覺得有啲後悔添。「我自己覺得對社運心灰意冷囉。我（依家）最多會喺facebook度留一兩句言啦，但係唔會再出嚟囉。」
難得呢位「雞排妹」頭號粉絲浪子回頭，「熱狗」當然咬實唔放啦，不斷留言鬧爆朱生，話佢恨出名恨到黐咗線，而家佢反骨仲要抹黑熱狗。嗱，朱生，睇到「熱狗」真面目啦！不過咁大個人，明知「熱狗」係咁都要同佢哋同流合污，真係唔抵可憐！
