圖：海洋公園昨在佳佳故居「香港賽馬會四川奇珍館」栽種一棵銀杏樹，以紀念佳佳
為港人帶來好多歡樂嘅大熊貓佳佳不知不覺間已經離開大家兩個月，海洋公園尋日喺佳佳以前住嘅「香港賽馬會四川奇珍館」種咗一棵銀杏樹，並撒下佳佳嘅骨灰，寓意讓生命延續生命。
海洋公園行政總裁李繩宗話，銀杏樹唔單止係古代銀杏類植物在地球上存活的唯一品種，有植物界「活化石」之稱，同埋象徵健康長壽及多子多福，而且佳佳嘅鄉下，四川省廣元市青川縣唐家河都有一棵樹齡超過千年嘅銀杏樹，所以先用銀杏樹紀念全球最長壽圈養大熊貓佳佳。
鄭晴後尾先知道，佳佳嘅骨灰係由海洋公園陸生動物部高級館長祝效忠親自撒下。其實，祝生當年係首批照顧佳佳嘅護理員，見證咗佳佳喺香港生活17年嘅點滴，直至佳佳離世最後一刻。鄭晴希望祝生已經走出佳佳離去嘅陰霾，一齊祝願佳佳喺天堂可以繼續無憂無慮咁食最愛嘅嫩竹。
