圖：陳恒鑌（左二）同另一位民建聯成員呂迪明（左一）一齊打扮成聖誕老人，提早派聖誕禮物畀小朋友/網上圖片

　　今個年度立法會大會已經全部完結，議員聖誕節都有幾日假期唔使開會，不過鄭晴同幾位民建聯立法會議員傾過，大家都無打算趁假期飛去外地玩。

　　民建聯陳恒鑌（Ben）尋晚同另一位民建聯成員呂迪明一齊打扮成聖誕老人，喺街上提早派聖誕禮物畀小朋友，小朋友抽到禮物都表現得好開心。阿Ben仲話，分享就是快樂。阿Ben同鄭晴講，放聖誕假會同屋企人去露營，初步計劃去西貢灣仔，等仔女接觸下大自然，體驗下野外生活。阿Ben又分享自己嘅湊仔經，覺得唔需要對仔女過分保護，有時都要等佢哋經歷一啲跌跌碰碰。民建聯張國鈞（Horace）都話聖誕唔會出外旅遊，留喺香港陪下屋企人，可能會去郊遊。兩位二十四孝爸爸都可以趁假期共聚天倫，真係幾溫馨呢。

　　Ann姐將探訪智障人士

　　而民建聯九龍西議員蔣麗芸（Ann姐）就話，今年聖誕都係留返喺香港過，有時間都多啲落區擺街站，見下九龍西嘅街坊，可能會同智障人士一齊過聖誕，去中心派下聖誕禮物，陪大家歡度佳節。Ann姐話，節日就係要同大家一齊分享快樂，先特別有意義。另外，Ann姐仲記得，民建聯之後會約埋23號一齊去工展會行下，就算唔使開會，其實都幾忙㗎！

　　鄭晴