蘇錦樑（左三）尋日就探訪長者，同佢哋預早慶祝聖誕
聖誕節係普天同慶嘅日子，唔少政界人士都趁佳節臨近，向弱勢社群送暖。商務及經濟發展局局長蘇錦樑尋日就探訪聖雅各福群會柏悅長者日間護理中心（東區和灣仔）嘅長者，同佢哋預早慶祝聖誕。蘇局長着上紅色冷衫、戴上聖誕帽，化身聖誕老人。佢除咗向一眾「老友記」大派禮物，亦上台表演彈結他，同商經局政治助理陳百里一齊合唱聖誕歌，氹得「老友記」非常開心。蘇錦樑亦都感謝中心職員為長者提供優質嘅護理服務。
另外，民建聯婦女事務委員會亦都藉聖誕前夕舉行「聖誕愛心敬長者」活動，希望為長者送上點點關懷同溫暖。委員會主席兼立法會議員葛珮帆，聯同副主席董健莉、李家良同顏汶羽議員，喺前日探訪將軍澳「康君護理院」近80名「老友記」，同佢哋傾下偈，又送上毛巾、藥油等聖誕禮物。委員會呼籲市民發揮「施比受更有福」嘅關愛精神，藉節日將愛心傳遞畀身邊有需要嘅人。
