文｜鄭晴

　　立法會尋日復會，辯論教育界葉建源提出「下任教育局局長須具備的條件」議案。原議案的內文七行文字，有四行半都鬧緊教育局局長吳克儉，民建聯張國鈞（Horace）就睇唔過眼，所以動議修正案，將鬧爆局長嘅語句刪除，但保留咗餘下兩行嘅「局長條件」，亦無加入什麼政治元素，原議案亦都因此變得名副其實。

　　反對自己提嘅議案係咩玩法？

　　點知Horace嘅修正案通過咗，令原議案無得鬧人之後，反對派竟然喺投票表決全部投曬反對票，將葉建源本來對下任教育局局長嘅要求都否定埋！坦白講，尋日呢件事就係反對派成日為反而反嘅最佳例證，無得鬧人就連原議案真正有建設性嘅部分都唔要，到底當初動議嘅原因係咩？大家心照不宣啦。

　　Horace就喺Facebook開咗個「動議通識帖」話：「世界就是這樣諷刺！由於我提出修訂葉建源原議案的修正案獲得通過，因此其後葉建源的原議案必須通過，我對他的修正議案才有意思。結果是我和建制派各同事在表決時全力支持葉建源原議案，而葉建源和反對派則全力反對葉建源的原議案。大家聽得是否有點精神分裂呢⁈」

　　Horace嘅黨友蔣麗芸（Ann姐）更加恥笑反對派除咗投票反對自己議案，更加係「雙甩轆」。原來葉建源議案之後輪到辯論劉小麗動議嘅議案，不過劉小麗因為去咗司法覆核案而唔返嚟開會，令議案被撤銷。