Ben話行到邊都見到綠燈。陳恒鑌fb圖
民建聯立法會議員陳恒鑌（Ben），前日隨潮州商會訪京，獲全國政協主席俞正聲接見，Ben仲獲得「俞握手」添。阿Ben喺社交網頁暢談感受，話北京到處都係「紅綠燈」，但佢行到邊都見到綠燈，一路順暢，喺俞主席接見佢哋嘅釣魚台國賓館門前，「綠燈仲特別耀眼」。
阿Ben又同國賓館池塘嘅兩隻黑天鵝自拍，並留言指黑天鵝「變成了主角」。咦？字裏行間好似有啲微言大義咁喔。
阿Ben都好勤力，當晚就飛返香港，因為第二日立法會要開大會。佢同鄭晴講，近排特首選舉充斥住「黑天鵝」，CY宣布唔競逐連任都令佢好意外，究竟邊個會係下屆特首，真係好難預料。咁俞主席有無講到特首選舉呢？阿Ben就話無，俞主席嘅發言重點在於反「港獨」、堅持愛國愛港同支持基本法和特區政府施政，呢啲說話雖然耳熟能詳，但都係鏗鏘有力。
