有兩大專家傍實，CY笑笑口打針
文｜鄭晴
呢排天氣忽冷忽熱，大家都好易傷風。正所謂預防勝於治療，尋日特首梁振英（CY）就約埋五位主要官員，齊齊去打流感針，呢五位係：署理財政司司長陳家強、勞工及福利局局長張建宗、政制及內地事務局局長譚志源、保安局局長黎棟國，同埋創新及科技局局長楊偉雄。好多堅強嘅男人咩都唔驚，但係就最驚打針。不過呢，CY就一啲都唔驚，仲笑笑口添，梗係唔驚啦，原來CY身邊有兩位專家傍到實一實，佢哋咪就係食物及衛生局局長高永文醫生，同埋副局長陳肇始教授囉。
CY仲喺facebook發帖，叫大家「預防流感，各位市民，注意健康」。高醫生和陳教授，就一早喺到訪下葵涌普通科門診診所同東區尤德夫人那打素醫院時，已經打咗。高醫生溫馨提示各位市民，特區政府擴大疫苗資助計劃等涵蓋範圍，半歲至未滿12歲的兒童及傷殘津貼受助人士，可免費或受資助接種，孕婦亦可獲資助。
鄭晴都溫馨提示下大家，今日溫度會跌至15度，聽日最低會跌落13度添，要注意保暖，唔好凍親呀！
