santa kiwi（左）及santa apple組成全能港產聖誕老人團隊

　　「又到聖誕～又到聖誕～」一般講起「聖誕老人」就會聯想到長滿白鬍鬚嘅伯伯，或者係中年男士，但查實「聖誕老人」都有女士扮㗎！

　　講緊就係香港史上首位女聖誕老人Santa Kiwi（潘倩雯），佢日前仲夥拍師兄Santa Apple遠赴傳說中的聖誕老人故鄉─瑞典北部小鎮耶利瓦勒（Gällivare），參加有「聖誕老人奧林匹克」之稱的「國際聖誕老人運動會2016」，仲贏埋第三添！

　　作為比賽中唯一亞洲女性嘅Santa Kiwi，其實扮演聖誕老人年資僅得一年咋。佢話，出發到瑞典之前一直都好緊張，但都好滿意自己能夠保持港隊以往「必拿三甲」嘅傳統，更重要係，可能係國際舞台上話畀大家知「聖誕老人不一定是阿伯、不一定有鬚，其實女仔都可以做得到！」

　　運動會上有多個比賽項目。細細粒嘅Santa Kiwi身高約153厘米，因為人仔細細，就更令佢有平衡力同靈活性，參加「聖誕三項鐵人」可以話駕輕就熟！再加上師兄同自己嘅優點，比賽前每日進行嘅Santa特訓，練習包禮物、跟星級導師學跳舞、進行地獄式體能訓練等，令「細細粒」Santa Kiwi同師兄Santa Apple嘅全能港產聖誕老人團隊在「套索捕鹿比賽」中大幅拋離對手，得到呢項比賽第一名，乘勝追擊為港隊再奪佳績。