青年新政梁頌恆同游蕙禎因為宣誓風波而搞到冇得做立法會議員，搞到連本土派支持者都唾棄佢哋，本土民主前線發言人黃台仰就死心不息，不但走去台灣播「獨」，仲擺出一副好想「被照顧」的嘔心姿態，話希望台灣「成功獨立」之後，唔好忘記包括香港在內嘅一啲地區喎。
黃台仰前日響台灣出席「世界人權日嘉年華」嗰陣不單止自我奴化，仲拖埋港人落水，好侮辱咁話而家嘅香港人全部都唔可以叫做「人」，只係「奴隸」，因為冇自由、冇思考，聲稱只有「香港獨立」先可以令香港市民真正做返個人喎，真係鬼話連篇。
其實，經過宣誓風波之後，「本土派」已經淪為過街老鼠，人人喊打，就連「港獨先鋒」、另一位本土民主前線發言人梁天琦都自認好廢、好無能，仲話要走去外國讀書喎，唔該你黃台仰就學下人啦。聽下，台灣民眾都已高呼不歡迎「港獨」喇，就好似香港民族黨陳浩天日前去台灣，30名支持祖國統一嘅市民就喺「立法院」示威，高叫陳浩天滾回去。擺到明，呢的周圍搞事的破壞分子，全世界都唔歡迎你哋呀！
