因宣誓時「播獨」而失去立法會議席嘅青年新政梁頌恆，最近變咗「過街老鼠」，去到邊都「人人喊打」。有網民尋日喺「沉默之聲」嘅Facebook群組發布咗一段40秒嘅短片，片中多位市民拎住手機圍拍梁頌恆，有人鬧佢「正走狗」，又有人就叫佢快啲「回水」，交還薪津畀立法會。着住灰色有帽外套嘅梁頌恆攞住一個白色膠袋，被鬧期間一直無出聲，淨係低頭撳手機。
鄭晴發現片中嘅地點係梁頌恆居住嘅海怡半島，搞「港獨」嘅梁頌恆一直不肯道歉，又死撐將「China」讀成「支那」係所謂「鴨脷洲家鄉口音」，梗係引起一班海怡街坊嘅憤怒啦，呢啲咪有片有真相囉！
梁頌恆尋日又喺Facebook發帖，聲稱收到一封刀片恐嚇信，話驚連累屋企人。無論點都好，暴力威脅一定唔啱，但梁頌恆就話無謂去報警。咁佢如果真係緊張屋企人，都應該報警求助呢！
