CY同小學生真情對話。網上圖片

　　文｜ 鄭晴

　　特首梁振英一向愛耕種，工餘時經常喺禮賓府種花果。CY尋日就去咗大埔舊墟一間小學，唔係教種花，而係同小朋友一齊「割禾」，佢仲拍片擺埋上Facebook開心Share。影片中CY首先示範如何用鐮刀收割稻米，之後逐個逐個咁幫同學仔收割，不時大叫「好嘢！」鼓勵學生。佢又笑住話，其實割咁多都係煮到一碗飯咁大把，叫同學仔唔好浪費食物，因為「粒粒皆辛苦」啊！

　　CY尋日去咗大埔舊墟一間小學同小朋友一齊「割禾」。網上圖片

　　CY中午又與同學仔同枱食飯，品嘗下自家收割嘅「成果」。隨後喺學校圖書館同50幾位來自四至六年級小學生對話。同學們圍住CY，不停問佢問題，由考試、房屋供應、基本法執行、填海增加土地供應、獨居長者照顧等樣樣都問，就連大埔停車位問題都關心。喂，細路，咁細個就關心幾時可以買樓買車？睇嚟佢哋思維真係好似CY讚咁「思想活潑，對所提問題有認識」。

　　轉去東涌了解離島居民需求

　　唔好以為CY淨係鍾意見細路，佢離開學校之後，下晝即刻轉場去東涌，同40幾位區議員、立法會議員、青年團體代表、校長老師、前線社工等離島社區領袖交流，了解當區房屋供應、跨境校網、大嶼山及離島交通等等需求；佢又鼓勵，各社區領袖用唔同方式拉近社會同青少年距離，等佢哋能有更多實習、就業和認識社會的機會。

　　唔單止馬不停蹄咁落區，仲心繫年輕人需要，鄭晴不禁諗起，我哋嘅社區建設都係政府聽取民意後嘅施政，其實都同農夫一樣，「誰知盤中飧，粒粒皆辛苦」啊。