呀廷(圖左)同呀雄(圖中)原來曾經喺中學鬥過波，好似係。
大公網12月8日訊 （記者 周禮希）大家不嬲都知立法會議員好多都身兼多職，卧虎藏龍，不過估唔到能言善辯嘅背後，原來有一個個體育高手。尋日民主黨林卓廷（呀廷）同民建聯周浩鼎（Holden）喺議事堂傾開計，原來呀廷同工聯會陸頌雄（呀雄）中學嗰陣都係屯門區中學嘅籃球校隊，仲只係差一屆。無他嘅，兩位係立法會頭三位高嘅議員其中之二，兩位都高逾六呎，打籃球確係有優勢。
傾傾嚇，被大家講咗好耐嘅呀雄都出埋嚟傾，雖然事隔多年，呀廷同呀雄兩位對當年比賽都無咩印象，不過佢地估計，應該真係有同對方同場較勁過！呀雄話，好似記得呀廷幾好波，呀廷都話，記得呀雄啲隊友幾好波。Holden呢個時候就突破盲點，問呀廷做咩話人地隊友好波，係咪覺得呀雄唔好波先。呀廷就解釋，大家入得校隊，當然都係好波之人啦。有行家就建議，既然立法會都有足球隊，不如都組返隊籃球隊玩下，連打開欖球嘅Holden都話相當有興趣玩下喎。
