到底三位重量級議員加埋過唔過600磅呢?
大公網12月8日訊 （記者 周禮希）立法會今日續會傾民建聯陳恒鑌（呀Ben）嘅要求政府更新《香港規劃標準與準則》議案，可能因為係民生議題，反對派同建制派今日都幾合作，正正經經咁發言，呀Ben就修正案發言嗰陣就算指出民主黨尹兆堅內文計錯數，都因為估到佢原意而歡迎修正，全日會議更加只係點咗三次人數。民建聯主席李慧琼（Starry）就趁其中一次點人數嗰陣，喺社交網站同大家開個玩笑輕鬆嚇。
Starryy上載咗張宇人Tommy、張華峰（肥老闆）同石禮謙（大嚿石）喺議事堂嘅合照，圖片嘅Caption就話：「立法會會議室又打鐘了 三個小子在等開會，他們問我估嚇 他們加埋會否超過600磅？ 我話不知呀 你們話呢？」
唔少網民都有留言討論，有網友好認真討論三人加埋嘅重量，「肯定不夠，540磅+-10磅。」亦都有網友講笑話「3000磅都有」，不過最搞笑都係「加埋夠唔夠200歲」，雖然答非所問，不過都不失為一個好問題。
