Andrew希望梁天琦到哈佛思過。網上圖片
旺角暴亂「禍首」嘅本土民主前線梁天琦，最近自認因為「懦弱」，所以揀響宣誓風波期間一直「潛水」，仲話出年一月會到美國哈佛大學做半年研究員添。嘩，搞到香港立立亂，然後拍拍屁股走去讀番書，呢啲咪就係所謂「勇武」囉。哈佛校友嘅港區全國人大代表姚祖輝（Andrew）就話，希望梁天琦能夠響讀書期間好好反思。
Andrew話，梁天琦係繼前學聯秘書長周永康之後，又一位選擇出國進修嘅香港「熱血」青年。佢希望梁天琦能夠響哈佛學習嘅過程中，領悟哈佛嘅校訓─「真理」（Veritas），同時響政治理論知識嘅研究中，反思一下過往自己發起嘅激進抗爭運動，係咪真係對一個城市民主嘅發展有幫助。
另一方面，同樣係後生仔嘅羅冠聰就向外媒表明，如果自己被褫奪議員資格，會上街抗議同反抗。Andrew亦都勸包括羅冠聰在內嘅年輕人能夠冷靜思考，諗嚇自己嘅主見同行動係咪真係爭取所謂「民主」、為市民謀福祉。其實香港經歷咁多風風雨雨，好多市民都已經厭倦激進抗爭，希望呢啲所謂年輕「政客」能夠回頭是岸啦。
