市民只要用「舊相」參加比賽就有機會一齊瓜分四千張門票。圖為二〇〇六年時的海洋公園
海洋公園陪伴住港人成長，唔經唔覺出年一月已經踏入第40個年頭。園方為慶祝40周年，宣布由聽日起至本月29日，舉辦攝影比賽，送出4000張入場門票。想入去同「威威司令」瘋狂影相嘅話，梗係即刻參加啦！仲諗咁多？
海洋公園為咗鼓勵市民重遊舊地，重溫過去40年嚟，同摯愛親朋喺公園入面共度嘅美好時光。呢次推出嘅「集體造回憶」攝影比賽，市民只須交一張2011年或之前喺海洋公園入面影嘅舊相，加多張今年喺園內拍攝嘅近照，再加幾句情深說話，就有機會贏取免費入場門票。 至於每位參加者贏到幾多張門票，就取決於呢兩幅新舊相入面，出現咗幾多人。而網上投票票數最多嗰位，仲可以贏到有效期長達10年嘅智紛全年入場證優越卡四張。見證公園50周年有咩搞作不是夢！
