尋日立法會秘書處正式刊憲，宣布游蕙禎同梁頌恆原先嘅議席出缺，立法會仲要追討佢哋兩個每人約93萬嘅薪津。呢兩位當事人無得做議員啦，咁有咩可以做呢？咪係繼續擺街站囉！游蕙禎尋日就去咗港鐵旺角東站外面擺街站，抹黑政府伸魔爪，褫奪四位代議士資格，又聲稱自己要直接同市民接觸，講解呢兩個月發生咩事。
游小姐到而家仲係執迷不悟，依然都係歪理連篇。佢哋四個同你哋「青政」兩人係一樣，都係唔莊重、唔真誠宣誓，佢哋違法，政府依法辦事，有咩做錯呢？如果見到有錯都唔依法處理，反而縱容佢哋，香港仲係法治社會咩？
講到同市民接觸，好多網民直接喺游小姐Facebook表達不滿，網民黃子軒話：「好心妳（你）先檢討一下自己同好好修養一下自己，搞到今日田地都係自己攞黎（嚟）。」另一網民Winnie Yeung就話：「顧掂自己啦！咁得閒擺街站，諗下點樣嘔番哂（曬）D（啲）錢出嚟同找數先啦！」呢啲就係民意啦！
