呢個 「學社」咩研究、咩訪問都未做過，鄭晴好想知到底佢哋最後研究到咩出嚟

　　文｜鄭晴

　　因為「反國教」成立嘅學民思潮，今年三月宣布停止運作，原本就話今年暑假有前「學民仔」成立新組織，點知一直冇影，好似走數咁。前日終於找數啦！由前「學民」發言人黃子悅出面，籌組咗一個叫「教育實驗學社」組織，話要凝聚學生討論同做研究，希望社會聆聽學生聲音，但又好口響咁話要學生攞返教育主導權喎。軟硬兼施得來，黃子悅又「此地無銀」咁話，「學社」對「港獨」無特定立場，但係學生有自由討論，唔應該禁止喎；又話「學社」係獨立運作，無同香港眾志等任何組織有從屬關係，但係又唔排除之後會合作囉。咁即係點？

　　呢個 「學社」咩研究、咩訪問都未做過，鄭晴好想知到底佢哋最後研究到咩出嚟

　　鄧飛斥偷換概念

　　教聯會主席鄧飛就同鄭晴拆解釋疑，佢話，成年人以下嘅基礎教育應該係社會義務，由社會決定嘅全方位培育，為年輕人啟蒙。如果學生都未培養好足夠嘅獨立思想，就話要自己決定學咩，又點能夠決定適當嘅學習內容呢？鄧飛又直斥指「學社」呢種做法，根本就係偷換概念，好似校規，其實一向都有學生會、風紀同校方溝通。又話如果評核學生嘅方法都係由學生自主，根本就係將老師、大學教授邊緣化，到底仲要學校做咩？不如學生全部自修啦！鄧飛仲話，學生對「港獨」係咩都唔清楚，係咪有足夠認知去討論真係成疑。

　　鄧飛仲話，「學社」聲稱會做研究、訪問，其實都只係標準動作，睇唔出同佢哋提出學生主導嘅主張有咩關係。鄭晴聽完呢番咁入情入理嘅說話，再發現呢個「學社」其實咩研究、咩訪問都未做過，就已經有一個咁「政策式」主張要搞「學生主導教育」、「一定要有空間傾『港獨』」，到底最後研究出嚟有幾科學？有幾可靠？又有幾真確？全部都係大問號。