因為「反國教」成立嘅學民思潮今年三月宣布停止運作，話作為政治組織同作為學生組織嘅工作互相影響，所以成員會分別成立唔同組織做嘢，隔左無耐香港眾志就成立，密鑼緊鼓派羅冠聰參選立法會喇。時光飛逝，過咗將近九個月，繼承學民學生活動嘅組織先姍姍來遲，咁大家都明白入立法會同學生運動比，邊樣吸引學民多啲啦。

　　新成立嘅「教育實驗學社」由前學民思潮走淨嗰位發言人黃子悅籌組，佢話學社唔再行學民舊路，要凝聚學生討論同做研究，就校規、校內討論時事空間以及評核方法等議題，希望社會聆聽學生聲音，但又好口響話要學生攞返教育主導權，軟硬兼施咁喎。黃子悅話，學社對「港獨」無特定立場，但係學生有自由討論，唔應該禁止喎。黃子悅又話，學社獨立運作，無同香港眾志等任何組織有從屬關係，但係又唔排除之後會合作囉。

　　教聯會主席鄧飛就話，成年人以下嘅基礎教育應該係社會義務，由社會決定嘅全方位培育，為▉年青／年輕▉人啟蒙，提供正確知識、獨立思想同正面嘅價值觀。如果學生都未培養好足夠嘅獨立思想就話要自己決定學咩，又點能夠決定適當嘅學習內容呢？鄧飛又話，學社呢種做法根本就係偷換概念，好似校規，其實一向都有學生會、風紀同校方溝通。就算到大學嘅層面都有類似問題，雖然大學強調學生自學，但如果評核學生嘅方法都係由學生自主，根本就係將老師、大學教授邊緣化，到底仲要學校做咩？不如學生全部自修啦！

　　學社就話，學園要有討論「港獨」嘅空間，鄧飛認為，社會對於咩係「港獨」都未有好肯定嘅定義，學生對咩係「港獨」實際係點都未必清楚，好多時都只係聽到反對派一啲說教式嘅講法，但係佢地對於中國、香港嘅歷史背景又一知半解，對於學生係咪真係有足夠認知討論港獨存有疑問。

　　鄧飛又話，學社聲稱會做研究、訪問，其實都只係標準動作，睇唔出同佢地提出學生主導嘅主張有咩關係。其實呢個學社其實咩研究、咩訪問都未做過，就已經有一個咁「政策式」主張要搞「學生主導教育」、「一定要有空間傾『港獨』」，到底最後研究出嚟有幾科學，有幾可靠，又有幾真確，真係一個大問號。