中電企業發展總裁莊偉茵（中）話「光屋」規格原為60年代，中電工程師Raymond（右）同其團隊成功克服地勢限制，靈活地將「光屋」完成電力提升工程
都市人日常生活同電力息息相關，但早前入住全港首幢社會房屋深井「光屋」嘅基層家庭為咗電，就真係頭都大曬！原來，前身為前九龍紗廠眷屬宿舍嘅深井「光屋」建於1960年代，由於大廈嘅規格同供電系統係當年標準，為提升大廈嘅電力供應，中電要安裝成噸重、俗稱「火牛」嘅變壓器，一啲都唔容易！
話說中電企業發展總裁莊偉茵（Quince）、中電工程師Raymond早排一齊參觀「光屋」，巡視提升電力供應工程。聽阿Raymond話，由於「光屋」起喺山上，附近又雜草叢生，安裝木柱嘅位置有限，又用唔到直升機、吊臂車運送「火牛」，絞盡腦汁下，最尾諗到搭建臨時斜道，慢慢拉「牛」上山。
鄭晴就覺得，其實呢次拉「牛」上山供電，同做人道理一樣，最緊要識「執生」。面對唔同挑戰，都要靈活變通，絕唔能夠一套功夫走天涯。今次工程咁成功，難怪搬入「光屋」多月嘅楊生楊太話，家下居住環境改善咗，空氣好，小朋友活動空間大咗，一家大細都好開心喇。
